وثائق مسربة تؤكد أن الصين على وشك ابتكار آلة زمن حقيقية!
من فترة قريبة كدا، ظهرت وثيقة مسربة بدأت تنتشر بشكل واسع على الإنترنت قبل ما تختفي بغموض زي ما بدأت، والوثيقة الغريبة دي كانت بتقول حاجات مذهلة فعلًا، ممكن تلفلك دماغك تمامًا!
بتقول إن الأكاديمية الصينية للعلوم، اللي هي تعتبر أعلى مؤسسة علمية في الصين تقريبًا، بتتعاون مع شركة جديدة لبناء آلة زمن حقيقية! والآلة دي هتقدر تغير من تركيب الزمكان ونسيج الواقع نفسه، وإطالة أعمار البشر لحدود غير ممكنة بيولوجيًا بأي شكل!
هات كوباية الشاي الحلوة والنعناع، وتعالى معايا النهاردا أحكيلك التفاصيل المذهلة للمشروع دا، ونعرف مع بعض هي حقيقة ولا خيال، وإزاي مشروع زي دا ممكن يغير من شكل المجتمع كله!
ما هو جهاز توليد أنفاق الزمكان؟
شوف يا صديقي، حكايتنا كلها بدأت من سنتين كدا، في بدايات سنة 2021، لما في تقرير أو بريزينتيشن معمول على الـ(Power Point)، تسرب أونلاين، وبدأ ينتشر ويتعمله شير في كل حتة لحد ما وصل لشبكات الأخبار، وتقرير الباور بوينت دا كان بيقول إن معهد فيزياء الطاقة العالية (High Energy Physics) التابع للأكاديمية الصينية للعلوم، بدأ تعاون مع شركة جديدة اسمها (Ruitai Technology)، لتصميم جهاز اسمه الجهاز التجريبي لتوليد أنفاق الزمكان أو (Space-time Tunnel Generation Experimental Device)!
طب يا ترى إيه الجهاز دا بالظبط وبيعمل إيه؟!
الجهاز دا يا صديقي عبارة عن آلة معقدة بتشتغل بطاقة عالية، ومعتمد على فرضيات فيزيائية عديدة من أكتر من نظرية شهيرة، وحسب الوثيقة، فهو هيقدر يعمل تشوه أو (Distortion) في الزمان والمكان، أو زي ما بيُطلق عليهم في الفيزياء الحديثة الزمكان (Space-Time)، وعن طريق التشوه دا، هيقدر يتحكم في معدل تدفق الوقت، ويقدر يخترق حاجز الزمكان نفسه!
يعني الجهاز دا المفروض إنه هيقدر يكسر حاجز الواقع اللي بيتكون منه الفضاء نفسه، ويخلينا نقدر نسافر عبره في الزمن لقدام أو لورا! وبكدا الجهاز هيتم استعماله في تطبيقات كتير جدًا بداية من السفر بين النجوم أو الـ(Interstellar Travel)، ولحد إطالة متوسط الأعمار البشرية لرواد الفضاء أو غيرهم!
طب ثواني بقى عشان كدا القصة أصبحت أكثر إثارة، والموضوع دخل فيه تشويق كبير، يا ترى الجهاز دا هيتعمل إمتى؟ ومين الشركة الجديدة اللي شغالة عليه دي؟! خليني أحكيلك.
اقرأ أيضاً: الكشف الأكثر غرابة في الفيزياء الكمية
وثائق مسربة
بص يا عم، حسب وثيقة الباور بوينت المسربة دي، فالفريق اللي ورا الجهاز بيقول إنهم وصلوا لاتفاق تعاون مبدئي مع فريق أبحاث وتطوير بيتكون من مجموعة من أبرز الخبراء الأكاديميين في علوم الفيزياء النظرية من معهد أبحاث الطاقة العالية التابع للأكاديمية الصينية للعلوم، وإن كمان المشروع حاز على إعجاب وتقدير علماء وفيزيائيين كبار، منهم عالِم مرشح لجايزة نوبل اسمه جاو كون (Gao Kun)، وطبعًا الأكاديمية الصينية للعلوم دي حاجة كبيرة جدًا في الصين، فمعنى كدا إن الموضوع يستاهل الاهتمام فعلًا!
طب وبعدين؟!
اللي اتقال ساعة لما القصة دي انتشرت لأول مرة إن المشروع دخل مرحلة التمويل خلاص، وإنه بيتم إنشاء قاعدة للأبحاث والتجارب العلمية الخاصة بالجهاز والمشروع، وحسب كلامهم، فالمشروع المفروض يوصل لتحقيق أهدافه، وتنفيذ التجربة بتاعته بنجاح لأول مرة في التاريخ، في خلال فترة من 7-12 شهر بعد ما يتم التمويل والبناء بشكل كامل، مع توقعات بإن ممكن التشغيل الكامل يستغرق فترة أكبر من كدا، ممكن توصل لـ3 سنين.
طبعًا خلي بالك إن الكلام دا المفروض سري على أعلى المستويات في قلب الحكومة والنظام الصيني، فطبعًا غريب جدًا إن فايل باور بوينت زي دا يتم تسريبه بالسهولة دي، واللي قدامك دي صورة الفايل، وممكن تشوفها بنفسك لو بتعرف تقرأ صيني.
بحث مجهول الهوية
الغريب أكتر كمان إن بعد ما الموضوع انتشر ولقطته وكالات أخبار صينية وعالمية كبيرة، طلع معهد فيزياء الطاقة العليا التابع لأكاديمية الصين للعلوم دا، ونشر بيان رسمي نفوا فيه أي علاقة ليهم بالمشروع دا، وقالوا إنهم محصلش بينهم وبين شركة (Ruitai Technology) دي أي تواصل أو تعاون من أي نوع! والغريب هنا أصلًا إنهم ينفوا الموضوع أو يتكلموا عنه من الأساس لو هو محصلش!
مش بس كدا، دا كمان بعد بحث صغير كدا اتعمل من الناس اللي بدأت تدور وتدعبس ورا الموضوع، اتضح إن شركة (Ruitai Technology) دي أصلًا لسه شركة جديدة، تم تأسيسها قبل شهرين من بداية انتشار القصة دي، وتحديدًا في يوم 31 ديسمبر من سنة 2020، يعني المفروض إنها لسه شركة (Start up) بلغة البيزنس، يا ترى إزاي شركة زي دي عندها بحث أسطوري زي ده؟! ولا ممكن الموضوع يبقى تمويه على الشركة الحقيقية اللي بتشتغل وتمول، ويطلع الموضوع أغرب وأخطر مما إحنا متخيلين؟!
طب استنى استنى، في حاجة أغرب كمان من كل ده.
بعد بحث بسيط بردو عملته وكالات الأخبار والصحفيين، وعملته أنا نفسي كمان على الإنترنت، وممكن أنت كمان تروح تعمله بنفسك، اتضح إن مفيش أصلًا عالم اسمه جاو كون (Gao Kun) فاز بجايزة نوبل أو اترشح لها من الأساس! يعني العالِم اللي كان مكتوب في الوثيقة إنه كان بيدعم الجهاز والمشروع دا، مش موجود في الحقيقة أصلًا!
تعرف على: النظريات المختلفة حول الزمن
انطواء الزمكان قد يحدث
فالسؤال بقى: إزاي العالِم دا مش موجود في الواقع، وهو حسب التسريبات بيؤيد المشروع؟! ولا ممكن يبقى غلطة في الأسماء أو المسميات من اللي عامل فايل الباور بوينت أصلًا؟!
ولا ممكن يبقى الموضوع أكبر وأغرب من كدا، ويطلع حسب كلام بعض الناس إنه عبارة عن خطة للتمويه بردو على أسماء العلماء الحقيقيين اللي بيدعموا المشروع؟! زي اسم كودي مثلًا، معروف فقط للناس اللي جوه المشروع السري للغاية دا، ومحدش يعرفه غيرهم، عشان لو اتكشف أو تسرب أي معلومة عنه، ميبقاش أي حد من المشاركين فيه في خطر من أي نوع.
الموضوع مثير ومخيف، ومليان احتمالات غريبة فعلًا، ويكفي إني أقولك إن القيمة السوقية والمالية اللي مشروع زي دا ممكن يعود بيها اقتصاديًا، هتساوي تقريبًا 838,2 مليار دولار! عايزك تتخيل بس المبلغ في أحلامك وخيالاتك كدا وأنت بتقرأ السطور دي، وبردو مش هتعرف تتخيل الرقم دا كبير قد إيه، دي حاجة كبيرة على طموحك وطموحي أنا كمان!
ده طبعًا مفهوم وله مبرراته، عشان لو الموضوع حقيقي، تخيل أنت بس القدرات اللي ممكن تتوفر عند النظام الصيني أو الناس اللي ممكن يبقى في إيديهم مشروع زي دا، سواء منظمات حكومية سرية أو مؤسسات علمية بحثية، تخيل كدا يبقى في جهة في العالم، حتى لو شخص واحد بس، عنده القدرة إنه يستعمل جهاز بيعمل أنفاق في الزمن والواقع نفسه، ويسافر بالزمن لقدام ولورا زي ما هو عايز.
السفر عبر الزمن .. هل هو حقيقة؟
الحقيقة إن الموضوع دا بيداعب خيال المؤلفين من زمان جدًا، واتكتب عنه عدد كبير من الروايات والأفلام مقدرش أحصرها كلها، يمكن أشهرها مثلًا رواية آلة الزمن (The Time Machine) بتاعت رائد الخيال العلمي العظيم هربرت جورج ويلز (H.G. Wells)، اللي تخيل فيها فكرة آلة الزمن دي لأول مرة، وصورت شكل العالم في المستقبل ممكن يبقى عامل إزاي، ومدى القوة اللي ممكن تبقى عند الشخص المسافر في الزمن وشايف كل أحداث التاريخ!
ده غير أفلام كتير مالهاش حصر ولا عدد، كلها ناقشت موضوع السفر في الزمن دا بأشكال مختلفة، بعضها مخيف ومرعب ومثير زي فيلم (Looper) و(Predestination) ومسلسل (Dark)، وبعضها ظريف ومثير للخيال زي سلسلة أفلام (Back to the Future)، لحد ما بقت فكرة السفر في الزمن دي حاجة من أساسيات الأساطير الحضارية المرتبطة بعلوم الفيزياء والفضاء، وبقت حاجة يعرفها كل طفل، وبيحلم إن ييجي يوم في المستقبل وتتحقق.
كل دا والناس مش متخيلة إيه اللي ممكن يحصل فعليًا لو موضوع السفر في الزمن دا تحقق وبقى حقيقة واقعة!
اقرأ عن: أغرب ظاهرة في الفيزياء
ماذا يحدث لو تم تنفيذ جهاز أنفاق الزمكان؟
فتخيل أنت! تخيل شخص يقدر يعيش لفترات طويلة لا تستوعب بالنسبة لنا، بسبب التكنولوجيا اللي بيوفرها جهاز زي دا، تخيل شخص موجود ويقدر يتواجد في كل العصور، ويبقى قريب من مفهوم الإله عند الحضارات القديمة! عارف كل حاجة حصلت وبتحصل ولسه هتحصل، وموجود في كل زمان ومكان!
تخيل لو في شخص يقدر يسافر لأماكن تانية في الكون، وكواكب غير معروفة بالنسبة لنا، ويفتح الباب لثروات مفيش عقل بشري قدر يحلم بيها أو يتصورها قبل كدا!
الأدهى من كل دا، والمرعب أكتر، تخيل لو دا حصل بالفعل قبل كدا، وطلعت إن كل الظواهر الغريبة اللي بنشوفها بقالنا سنين حوالينا في العالم، ومش لاقيين لها تفسير، ممكن تطلع بسبب حد مسافر في الزمن، وبيلعب بالواقع بتاعنا كأنه بيلعب فيديو جيم على البلايستيشن!
ظواهر زي تأثير مانديلا (The Mandela Effect) مثلًا، اللي بيخلي ناس كتير تفتكر أحداث محصلتش في الواقع، أو تنسى تمامًا أحداث مهمة حصلت! تخيل لو دا طلع بسبب إن في شخص بيسافر في الزمن، وغصب عنه بسبب غلطات بسيطة بيعملها، بيغير حاجات غير مقصودة في نهر الزمن نفسه، وبيتسبب في إننا بنلاقي حاجات كنا فاكرينها كويس، محصلتش أصلًا رغم إننا فاكرين تفاصيلها كويس!
أنفاق الزمكان حقيقة أم خيال؟!
هل ممكن كمان إن ظواهر الأطباق الطائرة والأجسام مجهولة الهوية اللي الناس عمالة تشوفها في السماء في كل مكان في العالم بقالها سنين دي، تطلع في الحقيقة عبارة عن بشر متطورين وجايين من المستقبل؟! وقبل ما تفتكرني مجنون أو بقول أي كلام، خليني أقولك إن دي نظرية حقيقية موجودة فعلًا، وفي علماء بيقروا إنها ممكن تبقى حقيقة مش خيال!
فأنت إيه رأيك بقى في الموضوع الغريب ده؟!
هل ممكن فعلًا يكون في حد بيتمشى في الزمن براحته وبيلعب معانا استغماية، وبيغير حاجات من غير ما حد فينا، ولا حتى هو نفسه يحس، ويطلع كل دا بدأ بسبب مشروع زي ده؟ ولا ممكن الموضوع يبقى مجرد إشاعة هبلة من مصدر مجهول، ومالهاش أي أساس من الصحة؟!
الأهم، هل فعلًا تصريحات النفي الرسمية اللي عمالة تطلع من المؤسسات الصينية على الموضوع دا حقيقية؟ ولا ممكن تبقى خطة للتمويه على المشروع الحقيقي اللي بيعملوه فعلًا، ويطلع الموضوع أخطر مما أي حد فينا يتخيل؟!
الإجابة على كل دا –كالعادة– هسيبها لخيالك أنت.
مصادر:
https://www.popularmechanics.com/science/a35470439/is-china-building-a-time-machine/
https://thedebrief.org/no-china-did-not-build-a-time-machine/
https://www.giantfreakinrobot.com/sci/china-time-machine.html
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
