لو أنت واحد من الناس اللي بيسافروا كتير، فأكيد أنت بتركب طيارات في أوقات ومناسبات كتير ومتعود عليها خلاص ومبقتش تنبهر يعني، بس اللي أنت متعرفوش إن رحلات الطيران وتصميم الطيارات نفسه من جوه فيه أسرار غريبة شويتين، وممكن تغير لك فكرتك تمامًا عن الرحلات الجوية الروتينية اللي أنت بتعملها كل فترة.
كوباية شايك الحلوة ونعناعك في إيدك بقى، وتعالى أقولك إيه أغرب حاجات أنت متعرفهاش عن الطيارات.
أسرار رحلات الطيران
إطفاء أنوار الطائرة عند الإقلاع والهبوط
مبدئيًا كده، أول حاجة هتلاحظها وأنت مسافر بالطيارة لأي مكان إنك هتلاقيهم بيعتموا الأضواء ويقفلوا الأنوار وأنت طالع أو نازل بالطيارة في المطار، ولو سألت نفسك عن السبب قبل كده، فالإجابة مش إنهم بيحاولوا ينيموك ويرتاحوا منك ومن طلباتك ولا حاجة، بل بالعكس، بيكون هدفهم إنهم يعودوا عيونك على الضلمة عشان لو حصل أي حاجة غلط أثناء عملية الإقلاع أو الهبوط، ميبقاش الركاب مش شايفين حاجة ويقعدوا يخبطوا في بعض وهمَّ بينزلوا أو بيتحركوا، وتحصل مشكلة.
تغير مذاق الطعام على الطائرة
لما بتطلع بيك الطيارة وتبدأ الرحلة، وبعد شوية لما يجيبولك الوجبة بتاعتك، هتلاحظ إن طعم الأكل وأنت في الجو بردو بيبقى ماسخ كده ومالوش طعم، أو على الأقل طعمه أوحش من اللي أنت متعود عليه على الأرض، والسبب في ده مش إنهم مبيعرفوش يطبخوا أو جايبينلك أكل رخيص ووحش، لأ خالص، اللي أنت متعرفوش إن جسم الإنسان نفسه على ارتفاعات عالية بيفقد تقريبًا تلت قدرته على التذوق، وعشان كده بتحس إن طعم الأكل عادي جدًا ويمكن ماسخ كمان، رغم إنه في الحقيقة ممكن يكون أكل غالي ومعمول حلو.
اختلاف وجبات الطيارين عن المسافرين
الظريف بقى إن الأكل اللي أنت بتاكل منه على الطيارة، مبياكلش منه الطيار ومساعد الطيار، وده مش تفرقة عنصرية ولا حاجة، لأ الموضوع كله عشان شركات الطيران بتخاف إن يكون في حد عامل عملية اغتيال لواحد من الركاب أو حاطط سم ولا حاجة في الأكل، أو حتى إن الأكل يكون بايظ، فبيخلوا الطيار والمساعد ياكلوا من أكل خاص بيهم همَّ بس، عشان يحافظوا على صحتهم بقدر الإمكان، عشان متلاقيش نفسك فجأة في الجو ومعاك طيار ومساعد طيار متسممين وبيفرفروا في مقصورة القيادة، ساعتها مصيرك أنت والركاب اللي معاك هيبقى على الله حرفيًا، فاحمد ربنا على الموضوع ده.
شرب الماء على متن الطائرة
حاجة كمان، دايمًا وأنت بتسافر في الجو هتلاحظ إن زورك بيكون جاف وبتبقى عايز تشرب كتير، وده بيحصل عشان أنت جسمك بيفقد ربع لتر مية تقريبًا في كل ساعة بتقضيها في الجو، لإن الهوا بتاع الطيارة من جوه بيكون مضغوط ومعدل الرطوبة فيه منخفض جدًا زي هوا الصحرا بالظبط، وعشان كده بتحس إنك عطشان.
بس لو عطشت وأنت في وسط الرحلة، حاول تشرب مية معدنية، ومتشربش من المية الموجودة على الطيارة، عشان بناء على دراسات كتير اتعملت عليها فهي مبتكونش نضيفة خالص، وبتبقى جواها أنواع كتير من البكتيريا الضارة بالصحة، والمشكلة إن ناس كتير بيستعملوها وهمَّ مش مدركين ده، وبيحسوا بالموضوع بعدها في صورة مغص ووجع غريب بعد الرحلة.
تعرف على: الشائعات الإلكترونية وآثارها السلبية
مرحاض الطائرة
بمناسبة المغص، تعالى نتكلم عن الحمام شوية، تعرف إنك لما بتخش الحمام على الطيارة، فالباب بتاع الحمام عمره ما بيكون مقفول؟! آه والله، في ترباس خارجي بيكون محطوط في المعتاد ورا اليافطة بتاعت ممنوع التدخين اللي على الباب، والترباس ده بيخلي طاقم الضيافة بتاع الطيارة يقدر يفتح عليك الباب في أي وقت لو حسوا بأي حاجة مش طبيعية، فلو في أي وقت قررت تدخل الحمام تشرب سيجارة أو تعمل أي حاجة كده ولا كده، خلي بالك بقى عشان هتتقفش وشكلك هيبقى وحش.
بس لو قررت تدخل الحمام عادي عشان تعمل زي الناس، فيمكن مهم تعرف إن التواليت اللي بتقعد عليه ده بيكون شغال بقوة التفريغ زيه زي المكنسة، وبيشفط أي فضلات ويخزنها في تانكات بتبقى موجودة في ديل الطيارة، بس الظريف بقى إن زمان في الطيارات القديمة، مكانش في الكلام ده، وكانت الفضلات دي بتتشفط وتترمي من فوق على الأرض، وناس كتير جدًا سجلت مواقف كانت السما بتمطر عليهم قاذورات وبيبّي، حاجة مش لطيفة أوي يعني لو فكرت فيها.
المقعد الأكثر أماناً
لو أنت كنت فاكر إن أحسن مكان في الطيارة إنك تبقى قاعد قدام، فأنت هتكون غلطان، عشان في الحقيقة الناس اللي بيكونوا قاعدين ورا بيكون حظهم أحلى بكتير من اللي قدام، هتسألني ليه؟ هقولك عشان اللي قاعدين ورا بيقدروا يتصاحبوا عادي على المضيفات بتوع الطيران، ويطلبوا منهم أي حاجات هما عايزينها، وهياخدوها بسهولة ببلاش، لكن لو حد قاعد قدام طلب حاجة، فالمضيفات مش دايمًا بيلبوها عشان باقي الناس اللي قاعدين جنبه وشايفين اللي بيحصل هيطلبوا همَّ كمان حاجات كتير ومش دايمًا بيبقى في إمكانية لتنفيذ كل ده.
ده غير إن أصلًا حسب دراسة عملتها (Popular Mechanics) سنة 2007، ديل الطيارة بيكون أأمن مكان ممكن تبقى موجود فيه لو حصلت حادثة لا قدر الله، والطيارة وقعت، عشان أنت بتبقى بعيد نسبيًا عن مكان الخطر، ونسبة إن يحصلك حاجة بتكون أقل، يعني أمان وحاجات ببلاش، مكان استراتيجي من الآخر يعني.
حالات الوفاة
بما إننا جبنا سيرة الحوادث والناس اللي بتموت، فيمكن من أغرب الحاجات اللي هتسمع عنها إن مينفعش حد يموت على طيارة! ولو لا قدر الله حد جراله حاجة واتوفى وهو في الطيارة في وسط الرحلة، فطاقم الضيافة مبيقولش إنه اتوفى، بيقوله إنه سكران أو نايم أو أي حاجة، وبيتجنبوا تمامًا إنهم يعلنوا وفاة أي شخص، لإن ده بيبقى مخالف للقانون، لإنه في الجو مبيبقاش تابع لنفوذ أي دولة، وكمان عشان يتجنبوا خوف وقلق الركاب، ولو حصل قدامك موقف زي ده قبل كده، هتلاقيهم بينقلوا الجثة لأي مكان فاضي في الطيارة، وغالبًا بيكون قدام في الـ(First Class)، عشان يكون لوحده تمامًا ومحدش جنبه يكتشف الموضوع.
اقرأ أيضاً: الشركات العالمية والركض خلف السعادة!
تغير المزاج
لو أنت قفشت نفسك قبل كده وأنت متأثر أوي ومشاعرك فياضة وجياشة في وسط ما أنت بتتفرج على فيلم مثلًا في الطيارة أو حاجة، فاطمن أنت مش لوحدك، ودي مش هرمونات ولا حاجة، وده عشان ضغوط الرحلة والقعدة، بالإضافة إلى نقص الأكسجين الخفيف اللي بتمر بيه وأنت على ارتفاعات عالية، بيخلوا المود بتاعك يتغير بسهولة، وبتكون حساس شويتين أكتر من الطبيعي.
قناع الأكسجين
بمناسبة موضوع نقص الأكسجين، فأكيد أنت لاحظت في أي مرة سافرت فيها قبل كده إن الشباك اللي بتبقى قاعد جنبه بيكون فيه ثقب مدور صغير كده في الجنب، الثقب ده وظيفته إنه يحافظ على الهوا الدافي في الطيارة، وكمان ينظم الضغط الجوي عشان لو حصل أي حاجة للإزاز من بره، ميتكسرش وتلاقي نفسك بتستنشق الهوا السام على ارتفاع 10 كيلو في الجو، ويغمى عليك أو تتشفط بره بسبب فرق الضغط، ده غير إن قناع الأكسجين الموجود على الطيارة أخره يوفر لك أكسجين لمدة ما بين 12 لـ15 دقيقة بس، يعني لو حصل حاجة لا قدر الله، فالقناع بتاعك أخره ربع ساعة، وبعد كده على الله حكايتك.
طبعًا في حاجات تانية كتير أغرب من كده كمان بتحصل في الطيارات وفي الجو، ومحدش يعرفها ولا سمع عنها قبل كده، بس ممكن نتكلم عنها في مقالات تانية قدام لو الموضوع ده عجبك، فمتنساش تسيب لي رأيك في كومنت.
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
