فلسفة العِتاب وأنواعه!
العتاب: حُب، تمسُّك، بقاء، حِفاظ، كُل اللي عاتب “حب” من قلبه، ما هو لو ما حبّش مش هيعاتب ومش هيفرق معاه أصلًا يضيع وقته في عِتاب.
فقرر يعاتب لإنّه مُتمسّك” بالشخص اللي عاتبه ومش عايز يخسره، ودا عشان هو باقي عليه وباقي على العِشرة اللي بينهم والمواقف اللي جمعتهم والذكريات اللي عملوها مع بعض، وهدفه الأول والأخير من العِتاب إنّه “يحافظ” على الإرث دا وما يسمحش لخلاف يهدم اللي بينهم.
أنواع العتاب
على الرغم من جمال العِتاب وأهميته ففي 3 أنواع للعِتاب:
عتاب الأحبَّة:
دا العِتاب اللي بيبقى غرضه التمسُّك، وإن الشخص اللي قدامك بيقول لك بشكل أو بآخر إنّه متمسك بيك ومش عايز يخسرك، وقرر إنّه يعاتبك عشان يلفت انتباهك لحاجة مضيقاه ومزعلاه منّك، وبيقول لك كمان صالحني عشان أنسى اللي مزعلني ونفتح صفحة جديدة من غير أي زعل أو خِلاف.
عِتاب تأنيب الضمير:
ودا أسلوب ثُعباني بيستخدمه بعض الناس عشان يتلاعبوا بمشاعر اللي قدامهم ويحسسوه إنّه مُذنب، والنوع دا من الناس درامي لأبعد الحدود، وحابب دور المظلوم وبيستلذ بكونه عايش دور الضحية طول الوقت، وعُمر ما كان العِتاب اللي من النوع دا حُب، هو بينقل لك التوتر وبيأنب ضميرك وبيخليك جلاد لنفسك ويحسسك بالذنب طول الوقت وكأنك مُذنب وفي الحقيقة إنتَ ما عملتش أي حاجة.
عِتاب التخلّي:
ودا أغرب نوع عِتاب ممكن تعيشه، إن شخص بيعاتبك على حاجات من صُنع أفكاره وخيالاته بهدف إن يهد المعبد، ويطلعك شخص بايع وشخص لا يُعتمد عليه، ويطلع فيك عيوب كتير قبل ما يمشي ويسيبك، أو بوضوح هو بيبقى مقرر يمشي ويسيبك، بس مش هينفع يمشي كدا من غير ما يصدر لك صورة سيئة عن نفسك، ويحسسك أد إيه إنتَ شخص بشع وإنّه كان مُتكرِّم بأخلاقه وتحملك الفترة دي كلها.
اقرأ أيضاً: يمكن للعقول أن تلتقي عليها
قواعد العتاب .. لا تعاتب من لا يستحق
عشان كدا لما حد يعاتبك ركز وشوف إنت بتتعاتب من أي نوع من البشر؟، وعتابه دا هدفه إيه؟ يعني بوضوح كدا هو عايز إيه منّك وعايز يوصل لإيه، لو بيعاتبك عشان باقي عليك راضيه وما تسيبوش غير لما يصفى لك، ولو بيعاتبك عشان يشككك في نفسك، ما تصدقوش وما تسمحش لنفسك تسمعه وتتأثر باللي بيقوله، ولو بيعاتبك عشان تبقى دي حجته عشان يمشي، افتح له الباب وودعه وقول له مع ألف سلامة.
مقالات ذات صلة:
* تنويه: الأفكار المذكورة في المقال لا تعبر بالضرورة عن رأي الموقع.
_________________________________
لمتابعة قناة اليوتيوب لأكاديمية بالعقل نبدأ، اضغط هنا
لقراءة المزيد من المقالات، اضغط هنا
