خط قنالنا
قيد الشمع يا خط قنالنا
واقطف م الأحلام وناولنا
طول م القوة بتحمي أملنا
آمانينا تحقيقها أكيد
سمعنا يا زمان سمعنا
سيب السلك يقول ويعيد
على وتر الأمجاد متعنا
واحكي قصة بورسعيد
عيد النصر بقاله سنين
من أيام ستة وخمسين
لما الخونة المحتلين
عدو العدة وشدو الشدة
وهجموا علينا بشر مبين
قولنا ساعتها العين بالعين
وقابلناهم بالنبابيت
وغطا الحلة وشقف القلة
جوة الحارة وبرة البيت
تسلم إيدك ياللي رميت
واتحديت مكر الملاعين
كل ما يوليو يهل علينا
ضي الذكرى يشقشق فينا
يالي قطعت إيدين أعادينا
شايلينك في حبابي العين
ألف اسم الله صلاة الزين
فدائيين عناقيد عناقيد
إسماعلية نشيد متوالي
عيد الشرطة قمر بيلالي
الصامدين جاهزين طوالي
صانوا العرض بعزم شديد
قالوا نموت وسلاحنا في إيدينا
مش هنسلم مهما جاهدنا
مديريتنا وحق بلادنا
وأنتو شوية محتلين
نقشوا في لوح المجد حروفهم
واتنين وخمسين شرفهم
ولأسلافهم سابوا علامة
خلوا الهامة فنار نياشين
وهبوا الدم بحب ولذة
لجل تعيش الأمة في عزة
هزوا غرور الغادر هزة
صبوا المزة لفجر جديد
جوة وريد المجد سويسنا
إيد على إيد بتعلي أساسنا
لحن ولاد الأرض وناسنا
وهلالنا وجرسنا سعيد
بعد بريد النصر ما جانا
والشوق واقف يستنانا
الأهوال هبت في سمانا
واتعكر تلاتة وسبعين
عدلنا الموازين من تاني
عبد الحي معاه ورداني
والمدفع في إيدين حساني
وبشندي والجندي حسين
دبوا في عين القهر رصاصهم
إللي في عز الضهر قرصهم
وبإخلاصهم جابوا خلاصهم
وسويسنا ضربت سلامين
ياللي شبابك ضي عنينا
قفلو الجرح اللي بيكوينا
كتبو كتاب النصر علينا
وفتحنا للفرح بابين
كف العيد بالهنا متحني
وشموعنا سهرانة تغني
مصر ياست الكل اتمني
واحنا نجيلك بالملايين
